12.21.2008
12.21.2008 16:47 黃頁
潼潼上兩星期已經會自己企起身行一、兩步,當時我仲同老婆講話:「過年前實識行啦!」。點知,事隔只係十零日,潼潼已經可以通屋走喇,只係十個半月咋~好叻女呀!

一齊黎睇下潼潼行得有幾快啦!

足足行左三十步呢!

P.S. 唔好問我點解打直拍...

11.22.2008
11.22.2008 23:02 黃頁

搬左入東涌快要一年喇,由於妹妹仲好細,帶齊佢地兩個出街都幾麻煩,所以到現時為止,一家四口出門普遍都只係去到東薈城咁大把架啫!上兩星期,聽見新聞講起昂坪三碌拎,兩公婆就覺得:住得咁近,搵日帶佢兩個去行下啦!於是尋晚就係咁已做左D資料搜集,決定今日同兩個B去搭纜車喇!


出發喇!咪住,打左蛇餅先…

生意淡薄

嘩!星期六喎,買飛都唔使排隊?打左十零分鐘蛇餅仔就上到纜車!?睇黎港鐵真係要諗諗計先得喇!不過對我地黎講,冇人搭仲好…小朋友耐性不足,最怕排長龍架喇!

打蛇餅期間,發現車站下面原來有間叫做三碌拎森林餐廳既野,而且門口放左兩架小朋友size跑車,深深咁吸引住恆恆既目光,遲D有機會要去睇下有冇幫襯喇!


向昂坪出發

終於到我地喇,由於人生路不熟,一家四口坐左倒頭車位,搞到大家都要令轉面先睇到前面既風景!不過算啦,因為一如所料、其實冇咩好睇啫…同海浪公園既纜車景比較,大嶼山D山景遜色得多;而海景就因為近日天氣麻麻,纜車上高少少就幾乎連海都望唔見!


一上纜車就可以望到我地屋企逸東邨喇


天氣唔好…


最可惜係連近近地既機場景都灰蒙蒙咁!如果唔係既,小恆恆見到D飛機起飛應該都會好興奮。條路其實好長都,沿途既山路都見到有唔少人行山,仲有人同我地揮手添(-_-'|)…唔…所謂快樂不知時日過,話有廿零分鐘既車程,當大家仲系道左擰擰右令令、擺緊post之際,纜車已經到站喇,有D唔夠喉添!


話都冇咁快就到喇!

昂坪市集

第一個感覺係:好靚靚呀…勁有電視城布景feel喎!行多兩步,見到有中式糕餅賣,買左一細盒芋頭糕(注:唔係酒樓果D…係似香蕉糕果隻.但聲稱係芋頭味既),講得咁清楚,唔係想賣廣告、係想話比你知:好難食呀!最終兩公婆你拎一件比我,我又拎番一件比你,好快咁就食晒佢喇…



中間D帳篷同個市集好唔match!


各位團友請留意左右兩邊既招牌…

竟然搵到野啱買!

行下行下、係咁行…呢道冇野睇、果道又冇野玩,直至行到優之良粉,小恆恆兩眼發光!入到去見到有一大堆懷疑係復活節賣唔晒,改左招紙變身而成既聖誕蛋蛋,兩兄妹都為之著迷…於是大小聖誕復活蛋各買一隻,就當係兩小B出遠門既收穫啦!



聖誕蛋…
 
自己揀!

恆恆玩到唔肯走

一買完隻蛋行出黎,恆恆就唔要隻蛋喇…於是我地就繼續前進啦!由於我地對前面一間賣大澳特產既shop有興趣,而間野又好細間,所以媽咪就代表我地入左去睇,爸爸就留守出面陪兩個B喇。呢個時候.恆恆轉身一望,見到一條斜路加埋一條樓梯,佢諗都唔諗就沿斜路跑左落去、跟手再由樓梯跑返上黎!如時者,跑左都唔知幾多轉喇,直到我地買完野佢都唔肯跟我地走呢!

大膽再試食

爸爸食麥芽糖餅…冇咩特別;老婆食雞's藤,冇問咩味道,不過佢無講過難食。





天壇大佛

逃離市集,行幾步就到左寶蓮寺喇。兩公婆其實都未黎過寶蓮寺,之前亦講過想去試下D薺菜既,可惜因為行程緊迫,帶左兩個B系山腳同大佛say左聲hello就要準備返屋企家喇。

起程回家

臨走前,見到廣場上有小朋友玩緊竹蜻蜓,睇到好有興趣咁!於是兩公婆明知佢未識玩,都走左去士多買左個比佢。結果由爸爸玩左一陣比佢睇,我地就起程喇。


∵ 斜路 + 樓梯 = 恆恆最愛…


∴ 恆恆跑左十次都仲未肯走!


妹妹去緊寶蓮侍時訓著左,見唔到大佛伯伯添!


恆恆:「爸爸,條樓梯咁長,點上去呀!」


恆恆:「爸爸,搭(纜)車呀!」


妹妹上到纜車就醒左…



仲玩都好開心添!
 
點知…


轉頭落車又椿晒眼訓咁!


值得去支持一下

昂坪市集對遊客來說還可以睇睇,可借對本地人吸引力真係有限,D店舖都係冇咩特別,連優之良粉都有你就知咩事啦。不過咁,纜車來回飛賣$88其實真係唔貴,因為就算坐巴士去昂坪,假日單程都索價27個大洋(閒日17.X),仲要係D唔係咁好坐既旅遊巴添!

11.01.2008
11.01.2008 23:35 黃頁

呢張係試圖同佢自拍證件相既惡搞作品

較早前詢問得知心水的佛教真如幼稚園今日會有PTA-Function,有興趣可以上去睇睇咁話喎,於是剛剛去完天主教幼稚園、失望而回既四口家就馬上走上去睇睇喇!

好多人,好熱鬧

一上到去就見佢個接待位有一大堆小朋友、家長同老師,睇落直頭熱鬧過人地既Open Day喎!我地表明來意後竟然由副校長出黎接待,唔知係其他教職員忙到應付唔到我地,定係真係咁誠意滿分呢?

先黎有少少不滿

媽咪之前其實打電話問左好幾次有冇開放日架喇,次次都話未confirm!點知我地一問個副校長,佢就話今年唔會搞Open Day喇,但就歡迎家長平日帶埋小朋友上黎參觀咁話喎!咁就激死喇,早知係咁,一早就自己踩上黎睇啦!


個副校長得得地

好彩個副校長帶隊過程講解夠清晰、又好禮貌,尤其係當恆恆叫極都唔聽話既時候,佢仲好有耐性咁慢慢等我地,比人既感覺係「大既做得好,細既應該都做得唔錯掛」。

唔聽話既恆恆

行左一陣,恆恆入左去一間高年班既課室,之後就點叫都唔肯出返黎!一來有老師系裡面做緊野,而副校長又等緊我地,搞到我地都有D唔好意思呀!最終副校長提議留佢一個系裡頭,並交帶裡面個老師睇住恆恆,我地先可以去睇第二D野咋。最終要我地睇完晒要睇既野,再去氹左一輪佢先肯出黎…

課外活動

由於係星期六,有一班小朋友學緊舞龍,小恆恆一見就嚇到唔敢走埋去喇。打聽後知道仲有爵士舞學添,由於小恆恆一向有聞(勁)歌起舞既習慣,唔知到佢返學時仲有冇得學呢?


而呢張就係最終交左比學校既證件相


比我地悶親既妹妹…

即時報名

參觀完之後,兩公婆都覺得好滿意咁,於是就即刻同佢報名喇!一問佢地攞表,個老師就表示上午同全日班都full左喇…不過好彩,媽媽其實都偏向想比佢讀下午班多D。

交左表就要帶佢去初步interview喇,呢個時候、我地兩個先知道,原來門口一大堆人都係黎報名架!

期待零玖年玖月

同之前一樣,恆恆既發展都仲係比較慢,尤其係語言方面。結果,面試既成績當然係比較差啦,不過學校已經講明只係想了解下D小朋友既程度,面試結果係唔會影響收唔收佢既。所以沿無意外,小恆恆下年九月就會讀呢間幼稚園喇,好期待呀!

P.S.因為唔係開放日,所以冇做現場直擊,一張相都冇影…

22:50 黃頁

好早已經知道今日會有間幼稚園搞Open Day,但係時間就問極都Confirm唔到!直至今早先打去confirm話朝早九點開波!於是兩公婆就匆忙準備帶埋小恆恆兩兄妹去玩下啦,點知…

冇人參觀

今日參觀既係天主教幼稚園,好處係有直屬小學(但間小學係咪好野就不得而知喇!)。好喇,終於到左啦…而已!點解咁少人既呢?上次去果間多人都不得了架?


參觀日…


冇野睇、冇野玩!恆恆只好無奈地走…

參觀日≠開放日

一問D職員,『Uh~Oh!』一聲不禁於內心深處走到上我塊面度,當場令我無晒心機!原來今日唔係開放日,係「參觀日」咀話喎!咁即係點先?哦,原來係佢D學生有星期六課外活動,順手開埋大們比你地入來睇睇囉!

本來睇開放日既原意係想睇下間學校做野既Quality,即是校方有冇用心做好D野。個人覺得開放日變左參觀日就原全冇晒意義喇,如果係想比人睇平時上堂既情況,又何必要星期六先放人入屋呢?平時比我地上黎睇仲好啦!

雖然開放日搞得好可能只係包裝叻,但係連包裝都唔用心,你叫我地為人父母者點會比D仔女讀得放心呢?

失望而逃

更失望既係,本來想比恆恆同多D小朋友玩下既,點知係冇野玩既!基於冇野玩,加上呢間本來就唔係我地既心水(因為兩公婆唔係教徒),於是睇兩眼…連相都冇影一張就走喇!

P.S.同日到了心水的佛教真如幼稚園參觀,下次再講。

10.25.2008
10.25.2008 22:55 黃頁

傳說中另一間不錯的選擇

緊接上星期,一家四口又到另一間幼稚園參加開放日活動喇。今次睇既係網友普遍有正面評價既浸信會幼稚園,不過其實都一樣唔係我地既心水首選。


玻璃天花,感覺唔錯!


恆恆一見到滑梯就失控…

地方好似幾好

可能恆恆已經當左係例行活動,今次佢肯自己行入去玩喇!

由於呢間幼稚園位處頂樓,一上到樓就會發現個玻璃天花,小朋友於室內玩耍都可以曬下太陽.幾好!不過望真D,佢D班房間隔有D怪怪地,有D呢度凹下、果度又凸下既感覺,又扣番分。


車車有得睇冇得玩

行一陣就發現有好多車拍左埋一邊,可惜都係綁住左既,想比恆恆坐下都唔得,唯有用黎比妹妹做下影相佈景啦!


爸爸、驚驚,唔好放手呀~


嘻嘻…


爸爸、都冇野玩既…


怕污糟,唔鍾意玩!

話咁快玩齊咁多個遊戲

起初以為大機構既學校搞開放日應該會幾多野玩,但事實又唔係…比小朋友玩既野都幾冇趣味,而過程中我地發現:D老師好似唔係好得囉…走時兩公婆一致表示唔會揀呢間比個仔讀呢間。



都係畫公仔好玩D!

Sorry 相機冇電

Anyway,其實兩兄妹今日玩得OK開心既,可惜係爸爸忘了帶後備電,所以錯過左後半part唔少較為精彩既鏡頭呢!

10.18.2008
10.18.2008 23:00 黃頁

爸爸,後面有個B望實我呀!(設計對白)

去幼稚園玩唔夠皮

一向好貪玩既恆恆,又點會滿足於系幼稚園玩得果一陣呢!所以為左比佢玩番夠本,一家人回家稍息後又走左落街喇!



哦!咩黎架?(設計對白)


全部都係我既,嘻嘻…(設計對白)

很喜歡坐購物車…

由於去左Shopping入貨,買左一大車野又唔想叫送貨,於是向超市借左架購物車。起初係比恆恆坐住既,未去到公園,佢就急不及待跳左落車衝過去喇…已原本已經坐緊BB車潼潼又有D悶到發脾氣咁,於是媽咪就抱左佢上購物車坐喇。




將來會是購物狂嗎?

坐上去起初都唔係好慣架,不過搞下哩又搞下嘮、又覺得幾好玩喎,於是就唔肯比人抱番出黎喇!



有型嗎?

還車之旅

好啦,有借有還上等人嘛,就由個仔負責揸架車去還啦!今日都算玩到盡興喇,所以恆恆心情唔錯,仲好難得比我笠住佢個頭影左張相添!

22:25 黃頁

恆恆點都唔肯入去

隔左兩個星,又有幼稚園搞開放日喇。今次到網友好評既可譽幼稚園,雖然唔係首選,但係兩公婆都想認真黎睇下,順便比多D機會恆恆試下群體活動囉!


走夾唔抖既恆恆…


妹妹冇佢咁好氣,入左去先~

神秘原因令小恆恆唔肯入去玩

一上到樓,個仔連閚都唔肯出,又拉又扯、又有姐姐氹,最後連氣球公仔都出埋!結果搞左一大輪先捉到佢入要!

起初以為佢係唔夠訓所以唔想玩先唔肯入,結果玩左一陣兩公婆先知咩事…原來有神秘原因!


全程比個Miss跟住

間幼稚園睇落比上次果間好D,感覺上較新淨同企理。唔知係唔係佢地睇到恆恆咁上下大、系時候入學喇,所以整個參觀過程都由同一個老師緊貼我地一家人!雖然冇感覺到佢Sell間學校,但係我同媽咪都覺得有一點煩!

而由於受到神秘原因影響,恆恆一路都只係行行企企咁,咩都唔多想玩,所以都冇咩參與過各個課室既遊戲。於是媽咪捉佢睇左陣故事書之後,放左佢自由活動,結果又比佢發現到最有興趣「車車」卡、又同上次一樣玩都想拎埋走…


就係佢喇…


又比佢搵到車仔圖畫卡喇…


見唔見個Miss仲緊貼住媽咪呢…

自由活動

睇到冇野好睇,就帶左佢出Hall,又佢自己玩喇。兩公婆最想佢同人地D小朋友一齊玩,不過佢就始終都唔肯,依舊自己一個人玩,自得其樂咁…


唔肯入黎,最後又唔肯走

玩到上左間屋仔之後,恆恆就點都唔肯番落黎,甚至叫極都唔肯走添,真係比佢激死!


唔願走既大頭仔…
10.04.2008
10.04.2008 21:43 黃頁
由於恆恆下年九月就要讀幼稚園,所以今年就要報名喇。提到揀邊間黎讀,兩公婆就頭痛喇…單係屋企附近就有成七間幼稚園之多,一個字:煩!

一輪資料搜集之後,媽咪大概都有就首、次選喇。但係兩公婆都唔想一味信人講,於是就決定去齊咁多間既開放日,一於自己睇真D先決定!

第一次參觀幼稚園

終於到左第一間幼稚園既開放日喇!由於唔係好夠訓,加上現場實在係有少許嘈雜,恆恆一味走埋一邊、企定定咁!


企埋一邊的恆恆…


似唔似D人去旅行影既相?


「爸爸,頑玩」 (譯:爸爸,我要玩具)


見到電腦就好興奮!


呢樣係成間幼稚園最吸引恆恆既野!

參觀班房

因為個傻豬唔係好肯同其他小朋友玩,於是我地就拖左佢去睇D班房啦。見到有個班房玩拼字…仲要係拼中文字…由於個仔既程度不足,skip左、直入一間玩畫公仔既班房~

由於佢一向都鍾意亂畫一通,所以都玩得幾開心,但係玩玩下就見到四周圍都好多玩具,佢就開始唔專心,要拎D玩具黎玩喇!

唔睇故事書

畫完公仔,我地想帶佢去睇書仔,點知佢一D興趣都冇,一味比側邊D電腦吸引住…激死!之後媽咪就搵左D圖畫卡比佢睇,佢一睇到張巴士圖片就揸住唔放,幾乎想拎埋走咁!

應該唔揀呢間

兩公婆係咁已睇過晒間野,睇黎唔係咁好。連Open Day都係咁上下…冇咩吸引力,都係下次再睇第二間把啦…

9.30.2008
9.30.2008 23:00 黃頁

部相機進化到擁有自動超慢快門拍攝功能…

相機…出事!

呢排影完相睇番preview成日都覺得怪怪地,起初以為係部相機個鏡頭比個仔搞得多、搞到花花地有D蒙啦,點知…

平時都係等張Card爆左先過落電腦睇既,某日心血來潮想用電腦 preview 一下……嚇然發現…出事喇!D相好似set左超慢快門咁,又蒙又多影,放大黎睇仲有一橫一橫既Noise呀!


答案:傻瓜機唔再傻=瓜機

於是即刻拎起部相機,左look下、右look多下;睇下Dsettings、又reset下Dsettings……結果係:certified!

隔日打去Casio問…過左保養期,先比$$check機,個情況多數係底板出事,check完先報到價…喎…咁即係任你劏!?算把啦…

阿仔,部EX-Z110以後就由你揸機啦!


睇真D仲有最潮至in既橫間effect添!!
9.29.2008
9.29.2008 13:00 黃頁

BB女一定乖過BB仔??

錯喇…個女有幾搗蛋,一睇張相就清楚晒喇!比佢坐學行車既頭一、兩日,佢就已經控制得隨心所欲喇,一時去車下哥哥、一時去電視櫃掃下場嗡…總之睇少眼都出事系啦!最搞笑係佢哥哥,成日比妹妹撞到,都係要坐係佢既移動路徑上面玩既,車中一次就大喊(或大叫)一次,我地叫極佢都唔走,只好由佢叫下啦…


無牌潼潼揸快車…特登撞入檯底…


我聽唔到你講野…我聽唔到你講野…

個女咁曳,個仔有比較乖嗎?

係一樣咁惡搞架,愈大個就愈唔聽話!話佢仲細個唔識咁多野咩,又唔係呀,叫佢做D佢鍾意做既野,佢好話頭醒尾架;但一話佢唔好做D曳野時,佢實扮聽唔到架喎!(呢個時候,媽咪插咀:係啦,似足佢爸爸!)


恆恆點對妹妹

睇見隔離張相,以為恆恆好錫妹妹?又錯喇!平時佢係一樣玩具都唔會比妹妹玩架,仲要係即使自己唔玩既,一見到妹妹揸上手佢就會一手搶左去,跟手掉到無雷公咁遠!老婆話呢個係三歲以下小朋友既正常反應…唔,佢到三歲時,唔該提我review一下啦…


睇落好似一齊玩…


實情係成日掙野玩…

妹妹點對哥哥

同之前一樣,妹妹都仲係哥哥既忠實fans,但係就漸漸變成一個曳曳既fans囉。一有機會佢就會想點下哥哥架喇,而哥哥就好似有寶咁…Hi下都唔比!有時甚至會出手扯哥哥頭髮添,激到哥哥大嗌「走開呀」兼一手推開佢…尤其係呢排妹妹已經識爬,兩公婆不時都會放佢落地自由活動既。從此,兩兄妹既衝突就此起彼落喇!

較新的文章 較舊的文章 返回首頁 訂閱: 文章

最近發表的文章
歡迎光臨