4.13.2008
4.13.2008 23:00 黃頁

今次既目標係妹妹!

上星期先同個仔搏鬥完,老婆今日第三次拎起個剪髮器喇。而今日既目標係同個女剃光頭!

嘩…女仔黎喎,做乜剃光頭呢?

原來係因為個女D頭髮甩得好勁,加上佢近日既皮膚比較差,比D甩出黎既頭髮"吉"到好唔舒服,所以兩公婆先決定同佢剃左佢囉!


剃頭仔前


都係剃頭仔前

快加好

個女呢…雖然係大隻B,但係始終都仲係BB,相比起哥哥就一D反抗能力都冇!結果成個剃頭仔過程,兩公婆都冇遇到武力抵抗、順利完成!而且呀,個女光頭Look都OK喎!

相呢?

點解冇剃完頭仔既相? 傻啦你…私人珍藏黎架,點會四圍貼架?

4.10.2008
4.10.2008 22:36 黃頁

哥哥好鍾意玩電話…


妹妹:我都要玩…


哥哥:咪搶啦,你都唔識玩!

兩個月來既進展

雖然佢地「住埋」都有成個幾月喇,但係因為哥哥始終仲係細個啦,佢對妹妹仲未係好接受呢!

最明顯係唔比兩個一齊同妹妹玩!幾乎每次我地兩公婆一齊同個妹玩佢都唔比既,一係大叫、一係是旦拖走一個…

想影多張相都難

本來好想多D影下佢地既合照架,但係最多都只係可以好似呢幾張咁:襯恆恆玩緊玩具時,人為地將佢搬埋妹妹度影番幾張…

點解咁想佢地合照?

因為大家都覺得佢地愈來愈似樣喇…所以爸爸咪想影D合照黎對比下囉!


好似伸緊懶腰?
No No…佢一路都係呢個Post訓緊…



訓醒喇…

2M6D/6.61kg/61cm---

今日特登請假同老婆帶個女去健康院,原來阿女已經6.61kg(約14磅9安士),成61cm「長」…兩公婆都唔記得阿哥兩個月時有幾重喇,有時間要番查資料先…

除左度長磅重之外,今日既重頭戲係打針!呢樣野兩公婆就仲記得…當時阿仔既喊聲同喊既時間都係全健康院之冠既!至於阿妹喇喎,唔知係咪真係有咁攰呢,訓住打支針入去、一粒聲都冇出,抽番支針出黎…仲訓緊!

P.S.妹妹第時睇番可以笑下阿哥喇!

4.07.2008
4.07.2008 22:00 黃頁

剪髮器再出動

近日天氣開始熱喇,所以兩公婆前兩日又拎起個剪髮器,想同個仔飛個靚髮喇!

講得做「又」就即是唔係第一次啦,對上一次(即係第一次)已經係剛剛搬過黎果時喇。其實爸爸諗起果次既情況,都唔係好想自己同佢剪!不過由於係老婆操刀…唔唔…一於試多次啦!

媽咪,不如你幫我剪個靚髮啦!

又剪得唔係咁好

結果?叫做比上次好D啦,上次比爸爸抱係身剪就好似佢打架咁,搞到我一身都係佢D頭髮之餘,剪得又唔係幾好!今次兩公婆學精左喇,放盤水扮同佢沖涼(因為佢勁鍾意沖涼),等佢坐低左先開始同佢剪,點知佢都係比D跌左落水既頭髮嚇到不停大叫大喊囉。最後系佢極之唔合作、兩公婆又唔熟手既情況之下,剪到有D一忽忽咁…媽咪仲因為咁有D唔開心添!於是兩公婆決定第二日再同佢剪多次!

喂,我剪左頭髮喇,好涼爽呀~

再修多一次:掂呀!

第二日,我地照原定計劃,做好心理準備同佢「搏鬥」多一次!

唔,結果呢…今次因為係修番D剪得唔好既位,唔知係唔係因為跌落水既頭髮相對少左好多既關係,佢表現得好合作,好快就搞掂左!正,兩公婆真係開心到幾乎喊左出黎呀!美中不足既係之前揀錯左個Adapter,剪得比預期短、效果差左少少啦…


後記:

老婆見同個仔剪左兩次都幾OK,於是又提議唔收我錢同我剪埋喎……唔……我諗左陣,都係唔好喇,我驚我叫得仲大聲過阿仔呀!

4.04.2008
4.04.2008 22:00 黃頁

真係好快呀!

唔覺唔覺個女兩個月大喇,家陣有幾重?唔知呢,要過幾日先去健康院磅過先知喇!

發展方面,個女比哥哥醒好多呢,早在個多月大時已經開始識人喇,每當媽咪或者爸爸近距離同佢講野,佢都會報以微笑,甚至會開聲應人添!


個女學識左同自己個拳頭玩…

不過都唔夠見到佢哥哥咁開心呀,試過是哥哥錯手打左佢一下,佢都仲笑住咁望到哥哥實一實呀!上星期起佢仲開始向爸爸發功,成日同我玩到KAKA笑咁,搞到爸爸暈暈地,連媽咪都開始唔抵得喇!Ho~ho~

較新的文章 較舊的文章 返回首頁 訂閱: 文章

最近發表的文章
歡迎光臨