12.23.2009
12.23.2009 09:37 黃頁

近日忙到不得了,有好幾個post都只係draft到一半,搞到好耐冇出post喇!今日恆恆開始放聖誕同新年假喇,希望可以襯呢幾日得閒少少可以update下個blog啦!

尋日過左婆婆屋企做冬,期間兩個B一度做左kid模,任人影相影唔停!

原本早幾日同華姐姐friend左既潼潼,今日一見到電左髮既佢又再走夾唔抖喎!之後佢一扎起左D頭髮,兩個又即時friend返喇!事件肯定左潼潼係怕鬆開曲髮既人喇!

另一邊箱,恆恆同表哥一路玩唔停,原本尋晚玩得最開心既佢,最終又係玩到唔比人走兼唔肯訓,喊左一大餐!

P-2009-12-22 001a

 

P-2009-12-22 22-13-14a P-2009-12-22 22-10-33a
12.12.2009
12.12.2009 23:15 黃頁

恆恆學校揀左大棠荔枝園做秋季旅行既目的地,兩公婆上網睇過介紹之後決定一家四口齊齊去!希望比兩個B體驗下大自然咁話啦!出發當日天氣好好,天晴又唔會好曬,而且又比之前幾日暖返好多,啱晒去郊外玩呀!

P-2009-12-12 10-08-50a 

開始玩遊戲 (又係傳波) 喇!恆恆個樣驚到好似要佢接炸彈咁~ (下圖)
P-2009-12-12 10-40-04b
 
荔枝園其實有頗多景點,可借睇睇run down,自由活動原來只有一個鐘,非常之唔夠使!於是只好揀D啱佢地玩既景點去下啦!

行緊去兒童樂園區途中,會經過一個細細既牛棚 (得一隻牛…),恆恆因為未遇過咁大隻既動物,一見到就走到老遠喇,而潼潼就冇咩反應!可憐既牛牛,大家都好似對佢冇咩興趣咁… (下左)

坐左大半個鐘巴士,終於到達目的地喇!原本比個導遊悶到呆呆地既恆恆終於笑返下喇! (左圖)

熱身

行程既首項活動就係集體遊戲,恆恆開頭唔係好願玩,不過一開始播D跳舞音樂佢又開始手舞足蹈喇,潼潼見大家跳得咁開心都忍唔住露左兩手! (下圖)

P-2009-12-12 10-32-22b

自由活動時間

集體遊戲過後、開始自由活動之前,一家四口小休一陣、食D野先。第一次去郊外既妹妹睇黎都享受咁,連叫佢影相時都掛住四周圍望,叫佢yeah就只係做動作,連望都唔望下個鏡頭! (下圖)P-2009-12-12 10-32-22b

P-2009-12-12 11-10-02 P-2009-12-12 11-14-02

一枝箭咁走左去既恆恆原來去左繩網陣!個繩網真係大,可惜設計比較適合大D既小朋友玩,恆恆根本唔識爬上去玩,所以只係走入去影左張相啫! (上右)

肥魚唔游水

過左繩網有個好大既魚池,裡頭當然都有好多好大條既魚啦,可惜D魚唔多活躍 (我諗係因為食得太飽啦,因為園方為左搵錢,人人都可以買包魚糧同蔬菜之類既野黎餵魚同動物既…),所以我地連相都冇影一張就行左去lu!跟住就到左成個行程中最開心既環節喇,就係去近距離接觸D小動物喇!

肥羊唔理人

園內放左數隻山羊出黎任人摸同餵的,不過我地見人地申手比食物果D山羊都係唔多so人既,無他既…隻隻都食到好似有左BB咁啦,仲邊有胃口啫,米嘥錢買野餵佢地啦!不過其實兩個B見到D山羊都係冇咩與趣,可能嫌佢地唔夠「小」啦!

恆恆餵兔仔 (右圖)

之後一見到D兔仔就勁開心喇!恆恆起初都有少少怕D兔仔既,因為D兔仔一D都唔怕人(正確來講係根本當D人冇到…)! 不過睇睇下恆恆就開始越走越近喇,最後仲主動踎左系其中一間兔仔屋前面、自己申手餵兔仔食紅蘿蔔添,連我地到估唔到佢夠膽咁做呀,真係好叻仔!

而妹妹其實對D兔仔好有興趣架,不過今次佢就冇哥哥咁好膽量喇!而且我地同佢講左好多次係兔仔,佢都係要話果D係WoWo,比佢激死…

餵過兔仔之後、一行出去就有老師提醒我地時間差唔多喇!真係好唔夠喉呀…

唔好坐牛車啦…

走時睇到人地「坐牛車」既情況,其實頗為殘忍的,一頭大黃牛拖住一輛差坐左約七、八個人既大木頭車…好辛苦呢,大家有機會去都希望大家唔好玩啦,拉一、兩個人就話啫!

唔貼題既「親子遊」

之後既行程都頗無厘頭的,食什麼海鮮餐、行海味街之類,仲有參觀恆香廠房…都唔知做咩親子遊會安排呢D活動既!好懷念小時候既學校旅行,去郊野公園之類既地方野餐或BBQ,玩玩集體遊戲、放放風箏咁…

P-2009-12-12 11-35 x4

點都好啦,行程雖然安排得唔多理想,不過兩個B今日都算玩得幾開心啦!

11.24.2009
11.24.2009 23:55 黃頁

頭先我一打開浴室門行出黎就嘩左一聲,原來老婆襯住我同恆恆沖涼果少少時間,幫潼潼剪短左前面D頭髮!第一眼真係唔多慣,所以嚇左一跳,不過睇真D就覺得佢成個洋娃娃咁、勁得意!

老婆話佢一D驚都冇,唔使好似以前同哥哥剪頭髮打晒架咁,只係三、兩下就剪好喇,可惜想再修一修既時候就出左少少意外,剪崩左少少。不過我覺得都唔係好覺眼,整體而言好OK呀!

(潼潼之前D頭髮長到成日撩到眼仔,經常會卒眼卒到成個look癲晒咁!左圖係剪髮前一日影既,而下圖就係潼潼啱啱前剪好時影既。)

P-2009-11-20 17-53-54a

P-2009-11-24 23-09 x4

10.17.2009
10.17.2009 23:30 黃頁

P-2009-10-10 20-10-16熱左成大半年,中秋過後終於有D涼涼地喇!

中秋前老婆已經打算襯住天氣未凍就同妹妹戒片既喇,不過因為太多活動、平日湊哥哥返放學又忙到飛起,所以都只係久唔久比佢試下坐BB坐廁、冇好認真同佢戒,次次都係試一陣唔得就即刻同佢著返片片。

直到今日老婆先至開始硬起心腸,點都唔同佢著片,一於要盡快同佢戒左片片佢喇!就係咁、潼潼只係用左一日時間啫,就學識左用盤盤wee wee喇!Wee完仲會起身大叫「成功喇」,非常搞笑!

後記:雖然之後幾日都經常出現「唔記得左冇著片」事件,不過好快就習慣左喇,認真叻女!

10.02.2009
10.02.2009 14:46 黃頁

返左一個月學喇,恆恆睇黎都好鍾意返學!幾乎每次叫佢返學都會乖乖換校服,要坐好得著鞋仔出門口既。放學問佢返學開唔開心佢幾乎一定答話開心既!

爸爸湊就唔肯返學

話就話恆恆鍾意左返學咋,但係佢就因為習慣左爸爸系屋企、就即係唔使返學。結果某日爸爸返夜,試試帶佢返學啦,結果唔肯入學校…最後要由爸爸拖到入班房,坐低左都仲要話「一齊齊返學」,最終我一走佢就喊喇!之後爸爸就唔敢再試帶佢返學喇。

學校又黎搞亂檔

話說回正式上堂既首個星期,星期四媽咪接恆恆放學時,老師突然話佢知:「聽日生日會,早放一個鐘。」,嘩,如果媽咪唔係全職揍湊佢地、而又有野做就真係比你地玩殘喇!咩都係好趕咁通知人既,唉!

唔合作 、唔合作…

夾夾埋埋已經比老師「投訴」左幾次「唔合作」喇!生日會之前,老師日日放學都會讚恆恆乖仔既,但去到生日會果日,老師就話恆恆又再表現得唔係好聽話喇!估計都係因為性格慢熱所致,返學唱歌食茶點都習慣左喇、又要佢做D唔同活動就唔肯啦。跟住有一日老師仲特登打電話比媽咪,話恆恆玩水彩時唔肯穿圍裙,搞到老師唔比佢玩添!

返學好累

恆恆返學前先開始唔訓晏覺,但係一開始返學呢,就幾乎日日放左學返到屋企、都會坐系梳化睇睇下電視豬左喇!一放學就訓覺呢樣野同爸爸以前一樣,但係佢就麻煩D,點都唔肯比人郁佢,想扶佢訓好個pose都唔得!

P-2009-09-11 17-54-06

P-2009-09-21 18-27-29 

成日打風落雨

聽媽咪講恆恆仔第一次自己擔遮就已經有版有眼!不過要帶埋妹妹一齊接送哥哥,認真辛苦晒媽咪喇!而且潼潼越來越曳曳,有日落雨送完哥哥返學、佢跟緊媽咪返屋企之際,佢學人踩水囉,極到媽咪死死下!

學習進度理想

K1唔使學寫字,只會教認字。暫時學校教既中文字,恆恆都可以輕鬆應付到;英文字母就有D阻滯喇,其實恆恆已經識晒廿六個字母,而學校就只係教到「D」啫,本來係好好地既,但係佢地係大細階一齊教就令恆恆有D混亂喇,明明兩個唔同樣又話知A同a都係A,我地都亂啦!

Anyway,一個月過去左喇,對於要返學一D都冇扭計,我已經覺得恆恆真係好叻仔喇!而且都學左唔少野,講野亦好左,感覺係真真正正大個仔喇,希望佢可以keep住繼續進步啦!

9.26.2009
9.26.2009 23:50 黃頁

隔左兩日、我地又返康怡食飯喇,今次係要同爺爺慶祝生日!今次恆恆冇咩扭計,只係一上到去就問我地攞車玩啫,後來表哥表姐黎埋之後就開始玩得頗癲。

而潼潼就可能因為未訓過正宗既BB床啦,成日都想爬上表弟仔張BB床囉!可惜今日忘了帶相機,冇得影低佢個樣!之後到左食飯既時候,比佢發現左一樣更加鍾意既野…就係沖涼盤喇!係咁走上個盤度坐低唔肯起身,最後整餐晚飯都係坐係沖涼盤裡面食既!

吹蠟燭

又到左切蛋糕既時候喇,恆恆當然又係第一個起埋去部住支生日蠟燭啦!細細聲祝左爺爺生日快樂之後又同爺爺一齊吹左佢。

P-2009-09-27-W01

P.S. 因為冇帶相機,偷住細表哥個blog果幾張相黎用下先! XD

P-2009-09-27-W02 P-2009-09-27-W03

9.23.2009
9.23.2009 23:55 黃頁

今日表弟仔滿月,恆恆一放學我地又出發返太古喇!今次我地改坐巴士,兩個都上車冇耐都豬左,令我地自覺比坐地鐵「安樂」得多!

然而當兩小B豬緊之際,恆恆班主任竟然打電話比媽咪「投訴」恆恆喎!話佢上堂唔合作、唔肯蓍圍裙,所以今日冇比佢玩水彩!叫我地試下諗方法令佢下次肯著喎…真係比佢激親呀。

我地因為要等埋恆恆放學先出門口,所以最後先到。一入到酒樓恆恆就話要走、想去吉之島玩玩具喎!都就黎上菜喇,我地梗係唔肯啦,結果佢抓實我隻手,哦左成半個鐘、係咁嗌唔好!結果要我專登發惡推開佢,佢先至喊晒口咁走左去老婆道,喊左一陣先至肯自己坐低食野。

妹妹就成晚都好乖乖、坐定定食野,將佢平時同哥哥嗌交打交既曳野完完全全收埋晒,令所有人都讚口不絕!那邊箱既恆恆平伏左之後都好乖乖咁食野,不過一食飽就走左去同細表哥玩、係咁周圍跑,叫極都唔肯停,結果又係玩到一身汗啦!

食完飯因為都幾夜喇,諗住即刻搭車走啦,點知恆恆拖左爺爺走!我地一度以為爺爺自己飲大左帶埋恆恆去左吉之島添…原來係恆恆想拖走左爺爺、正想過馬路去吉之島!於是我地想耍佢,行過去望一望就走啦,點知…

恆恆一路要拖住爺爺直上玩具部喎!當時仲有5分鐘就收舖喇,佢又唔肯走,大家終於被迫買左一set車仔比佢,又寵壞佢喇!乖乖既潼潼妹一路跟住大隊行,冇扭過一句計,同哥哥真係好大對比!

到左唔走唔得既時候喇,出吉之島前恆恆係咁要搭小巴,即係上康怡!搞到系地鐵站口拖拉左好耐,最終爺爺同麻麻要乘亂哩埋左,我地先可以夾硬拖佢走咋!

9.13.2009
9.13.2009 23:55 黃頁

星期六,四口子過左東邨同姨媽慶祝生日,星期日再拉埋大隊去銅鑼灣唱K!可惜浩賢表哥有D唔舒服,冇咩心機帶住恆恆玩,恆恆因此有D玩得唔夠咁!

P-2009-09-12 22-57-56A
恆恆做咩古靈精怪咁坐系個蛋糕前面呢?

P-2009-09-12 22-58-53A
因為佢認為所有生日蛋糕上面既吹蠟燭都要由吹熄既…

妹妹首次唱K

而潼潼今次係第一次跟埋我地黎唱K,應該係話潼潼出世之後我地第一次出黎唱K…潼潼一入房就搶左枝咪,但就只係鍚左枝咪幾啖,完全冇開過聲!之後亦唔肯再拎起枝咪喇(唔好鍚?)!

恆恆有D悶

恆恆都跟過我地幾次唱K架喇,仲係BB既佢以前一入K房就會好雀躍,今次可能係因為人多,而表哥又冇咩精神同佢玩既關係啦,佢幾乎成晚都係坐系細舅父側邊,冇咩動靜咁,睇黎悶悶地咁!不過可能因為之前見到人試咪啦,佢都會不時拎起枝咪學人地係咁「喂、喂、喂、喂…」,但係一叫佢唱歌,佢就會縮沙唔要枝咪架喇!

妹妹唔使比錢都勁食…

眾人都認為呢間卡啦OK既食物水準一向唔錯既,不過向來嘴刁既潼潼妹就只係欣賞佢地個果盤喇,而且尤其鍾意D西瓜,冇停口咁食左好多;除此之外D粟米應該都係佢既心水推介…

就係咁、兩小B又渡過左一個愉快既週日喇!

P-2009-09-13 20-32-05
"不"唔停手…
P-2009-09-13 20-31-27
經常失手…
P-2009-09-13 20-46-02
不如用手!
9.05.2009
9.05.2009 23:45 黃頁

上星期,兩小B細姑姑個B仔出左世喇,潼潼已經唔係家族中最細既B,而恆恆亦唔再係最細既B仔喇!隔左十日有多,四口家今日終於可以去探下呢個家族新成員喇!

P-2009-09-05 16-25-28a細姑丈的樣子、細姑姑的性格

潼潼爸及恆恆媽都覺得李小B個樣勁似佢爸爸,尤其係個細細既嘴仔!細姑姑說BB眼似自己,但我地睇除左係雙眼皮之外,都係似細姑丈多D!不過唔講個樣,表弟仔就有一樣野深得細姑姑真傳,就係好懶訓豬喇!我地上左去大半日就嘈足大半日…但係表弟仔都只係打開左對眼仔幾次咋,而且次次都係得一陣!幾嘈都好啦,佢都照訓…好厲害!

之前已經好鍾意玩BB公仔既潼潼,一見到BB就睇到眼都唔眨、抓住BB床欄係咁叫「BB…BB…」(爸爸只掛住睇,唔記得影相…);而恆恆亦唔似以前抗拒妹妹咁、一開始就肯出手摸下表弟仔喇!

 

祝 表弟仔

身體健康,快高長大!

8.24.2009
8.24.2009 12:10 黃頁

P-2009-08-22 23-48-18話說恆恆今年返K1(幼兒班),學校原本七月會開個家長,介紹學校同講解開學安排既,但係因為豬流感打亂左學校既安排,家長會延遲到早兩日先至開。原本學校一直話九月一日開學的,結果家長會當日先至話比我地知:8月24日起會有一星期既K1適應班(試學)!

唉,星期五話我地知星期一返學,真係比間學校激親!爸爸又冇請假、又冇搵其他人幫手睇住潼潼,一開學就要媽咪一個帶兩個,結果搞到我地都好煩!仲有一樣野,因為恆恆係大隻B,而學校又冇為K1學生準備大碼校服、結果恆恆第一日返學就冇校服著,要著運動服!

第一日返學

由於第一日家長可以全程陪同小朋友返學,於是媽咪就陪住恆恆返學喇。結果恆恆放學返來時不停咁喊,後來聽老婆話佢全程都好唔合作…老師要佢大家坐,佢就自己一個「企硬」;老師叫大家排隊,佢又自己一個唔肯排;唔肯食茶點、唔飲水…總之咩都齊晒…搞到我同老婆都好擔心佢第二日會更麻煩(因為第二日開始唔比家長陪)。

P-2009-08-28 09-22-38
第一日,恆恆同媽咪合力製作既太陽帽

P-2009-08-28 09-23-51
第二日,恆恆話係「恆恆整」既項鍊

 

第二日繼續唱反調

無錯,真係估佢唔到!第二日,媽咪送佢返去,見到大概係因為冇媽咪陪既關係、個個小朋友都喊晒口咁,只有恆恆一個冇喊!放學大家一齊去接佢,聽老師講恆恆好乖好叻仔、冇喊過,又肯食茶點(老師仲搭左句:仲有添呀),開心死我地兩個!之後兩日返去都好順利,真係好叻仔!

星期五有壓軸好戲

呢樣野都係家長會先比通告我地:學校擴建左兩個大水池,星期五會比小朋友齊齊返學玩水!

無錯,又係由媽咪陪同,而且又一次另媽咪好激氣。原本以恆恆慢熱既性格,已經估到要搞一輪先至可以氹佢落水架喇,但係成個活動就只係有個半鐘!

返來後老婆話恆恆最早上到天台水池,但係就最尾至落水玩!而且開頭玩得都唔係好投入。到恆恆開始warm up喇,老師就話返落課室換返校服喇,由於離放學仲有成半個鐘,老婆以為會安排埋茶點比小朋友食埋先放學啦,點知…一著返校服就話放學喇!

原本已經曬到熱辣辣既媽咪今日真係好慘,其實學校行返屋企只須五分鐘,但同恆恆換衫就耐好多喇!而且比小朋友換衫既地方又一定唔會有風扇同冷氣,幾乎焗暈老婆咁濟!連我都讚成、如果講明換衫就走得既,就不如唔使同佢換衫即走啦,又唔一早講比人知…真係激死人!

 
總結一星期

雖然學校既安排有待改進,但係返左一星期學喇,總括黎講恆恆都係開心既;而且都冇我地預期中咁唔適應,總算放心。期待下星期真正開學,恆恆可以返去玩得更開心啦!

換衫P-2009-08-28 11-10-58

出場P-2009-08-28 11-13-53

熱身P-2009-08-28 11-25-46a

投入P-2009-08-28 11-33-04a

鏡頭無做任何效果,恆恆真係好「大隻」,媽咪話有同學仔好似妹妹咁細粒咋!

P-2009-08-28 11-33-00

7.26.2009
7.26.2009 23:55 黃頁

媽咪秘密地約好左兩小B既太爺爺、爺爺、嫲嫲、眾姑姑連同表哥表姐一大枱人飲茶,地點當然係最近康怡既茶樓啦。

搭車時好曳既潼潼

上幾次坐地鐵都好乖乖既妹妹,今日去由東涌出發,都未到中環就開始扭計喇,直至到左茶樓都仲係扭緊,氹左一陣先肯坐定定。比同時期既哥哥,妹妹真係曳好多,以往恆恆搭地鐵最多扭要落車既啫!而潼潼就會扭計要落地玩既,搞到我地有位都冇坐得,要抱佢或者搒住佢企落地既!好彩恆恆搭車已經會乖乖坐定啫,如果唔係爸爸同媽咪真係唔敢去街都似。最後爸爸發現,車箱中越少人佢就越曳既,下次可能要揀繁忙時間搭車喇!

要一個鐘warm up既恆恆

飲茶期間,出名慢熱既佢幾乎要飲完茶先至入狀態,開始肯玩下!上康怡之前,三個姑姑連同兩公婆拖住五個B、加埋細姑姑肚裡面既表弟,數數手指原來成十一個人一齊去左吉之島既玩具部!一去到冇耐大家就發現恆恆揸住個Thomas電話喇,連拖住佢既姑姑都唔知佢系邊度攞既,大家都想知幾錢,但搵晒附近都搵唔到究竟擺邊度,相信係最後一個!後來搵到一個同款但唔同公仔既,最後兩小B各自添左一部新「電話」!

上到康怡喇,又有車仔玩、又有細表哥比佢追住,恆恆玩得不知幾開心,開心到唔理爸爸同媽咪!相信係因為我地平時都開始對佢有D管束喇,例如唔會比佢不停玩車咁啦,所以一放鬆比佢玩耐D就會有以下既情況出現,就係到最後要返屋企時,幾乎次次都會咁喊住唔肯走既!而妹妹上到去無幾耐就豬左,平時佢唔係訓自己床仔的話,一般都唔會訓好耐既,今次可能因為係地鐵玩得太攰喇、又遲左訓,所以訓左成個鐘頭有多!

再到夢之島


一家四口食完晚飯後要坐地鐵返屋企,康怡吉之島係必經之地,一場黎到、當然要比兩兄妹去夢幻樂園玩下啦!多年來吉之島都唔知番新左幾多次喇,但遠在「歡樂天地」之年已經存在、一個玩機動遊戲既地方-夢之島至今仍然存在,根據曦曦表哥所講現稱「夢幻樂園」。

 

P-2009-07-26 21-33-14

雖然一樣係由Namco經營,但玩既野都唔同左好多喇,以前既夢之島 (Wonder Park?) 其實係係間機舖黎,場內附有幾部旭旭下果類既車仔馬仔之類,旺場程度同家陣差唔多;但後來家用遊戲機普及,再冇小朋友出街打機喇,所以夢之島就漸漸變成今日既夢幻樂園、由一個原本比小朋友渡週末「過下癮」既地方,變成今日有好多跣手夾公仔機呀、輪盤煲大獎機同吸水彩虹池、鼓勵年青人消費既地方。唔經唔覺,由第一次黎打機、到今日黎消費,原來已經過了廿年!

P-2009-07-26 21-35-14

當年爸爸最愛打一款用兩支各有一粒掣既Stick打既Game,玩咩已經唔記得了,只記得玩到冇晒錢、得番幾毫子搭丁丁返屋企之前,仲可以走去同層玩具部排隊免費玩紅白機,即係就算冇錢,週末都一樣可以過得充實非常的!這依稀的記憶實在令人懷念,你說、做小朋友多好!

相關網誌:

細舅舅,生日快樂! @細表哥Baby的Blog

回憶、變遷,感慨:

歡樂天地 VS 冒險樂園 @HKBlog

7.09.2009
7.09.2009 23:55 黃頁
今日浩賢表哥生日,姨媽早已約定我地一家人到來慶祝喇。四口家早一晚就到了婆婆家過夜,準備今天的緊密行程。兩小B都訓得唔好,妹妹七點未到就起左身,哥哥亦緊接其後!不過由於有得玩,表面上還算很精神。

難得飲早茶

平時即使很早起床也好,礙於要準備好同佢出街都要花唔少時間;然後再要由東涌出到港島,冇一點都有十二點半喇,難得今日有機會到香港仔飲早茶!

睇卡通片竟然嚇壞人!?

還記得妹妹還未出世時,我地帶埋小恆恆去睇戲係無辦法睇足全埸既!試過一、兩次之後我地都敢再次挑戰喇!兩公婆因而好耐都冇去過睇戲喇!十二點到左數碼港戲 院,到買飛先發覺想睇既場次竟然係立體版,要價八十五個大洋!不過一行十人一場黎到,大人又多個小朋友既情況又冇理由轉Keroro軍曹…只好就範啦!買 飛時仲要話你知:唯有立體電影,不設信用咭九折優惠!Oh~表哥你做乜唔係星期二生日架!  

下半場出手

入場喇,妹妹開頭都好乖乖,而且仲肯帶立體眼鏡睇添!部戲係冰河世界3,立體效果不錯,但劇本就一如所料地無甚驚喜,叫做OK啦,連妹妹都覺得麻麻地,本來 開始睇時一直都只係不停地細細聲咁講野既、見到啲動物就叫下「Wo-wow」既啫,但到左中場佢就開始出手喇!先黎大叫幾聲,再扭計要落地。媽咪想用爆穀 氹佢啦,佢就將D爆穀塞比爸爸食…而且一路塞、一路大叫添,比佢激死!不過今日係佢第一次入戲院睇戲,咁既表現已經非常好了,最少我地都可以睇晒成套戲 啦!

恆恆大改一貫作風

爸爸記得有一次帶恆恆B去睇戲,睇左一陣佢就開始扭計、氹極都好嘈!結果搞到爸爸要抱佢入洗手間氹、睇完套戲之後就領略到咩叫「色即是空」喇…即係以後睇到個戲名會記得自己明明睇左、但又好似冇睇過咁囉!事隔唔知幾耐喇,再入戲院既恆恆仔今日睇得唔係好專心、而係太專心!唔知係唔係太早起身、開始覺得攰呢,佢全埸都keep住唔笑!同後面不時大笑既表哥、加埋大叫既妹妹形成強烈既對比!而跟以前對比更大既係、佢全場都肯戴住對立體眼鏡,還記得以前買左對太陽眼鏡比佢戴左兩、三次,次次都只係肯戴一陣咋!

三十幾度,一樣慢熱!

好喇,所謂好戲在後頭,今日既重點活動黎喇,睇完戲返回香港仔、我地齊齊向淺水灣出發! 一去到沙灘、恆恆一如所料唔肯落地,要由爸爸抱出沙灘!最後經過一輪熱身、玩左一陣水之後就開心晒,玩到唔停喇!  

妹妹首次浸鹹水

比起哥哥第一次去沙灘,妹妹相對冇咁驚青,不過就幾乎全程都坐系岸邊「不」沙,冇咩走動!

唔好講咁多,睇相啦!


全程玩沙既潼潼,加埋進入狀態既恆恆


潼潼全日唯一落水既情況


左有人印汗、右有人餵食野,巴閉到不得了既恆恆


浩賢表哥許願許到咁認真,祝你生日快樂兼願望成真啦!
5.17.2009
5.17.2009 07:12 黃頁
又一個5月17日了、轉眼間已經三年…我們的「寶貝仔」三歲大了!

長大了,卻又還是很小… 三歲的恆恆、表面上看起來有四、五歲般高大,衣服有些更是五、六歲的尺碼!可是,開口說話時,卻還是像個兩歲左右的小BB、至今完全聽得明白的就只有媽媽,連爸爸也經常要找她來翻譯才知道恆恆說甚麼!是的…爸爸不能沒有了媽媽,這就是一個例證…

三年又三年 為人父母三年,經歷了很多人生中不能錯過的時刻,感覺複雜得很…令人想唱一次Eason的沙龍…要作一個小結的話,就是快、樂二字;三年光陰雖不算長,但用上我人生至今十分一的時間都還在做的,就只有「揍仔」一事了!然而,眨眼間似的三個年頭裡,回憶中卻有著無限樂趣!當然也有不少辛酸事啦…!從前聽說過,為人父母一方面很想兒女快高長大、另一方面卻又很害怕兒女長大的…聽過了是明白的,但親身體會卻有令一番味道!

等、等、等… 等待他出世、期待他站起來、恨不得他快點向前走、渴望他叫爸爸、媽媽、還有…還有…回想起來,三年多的時間就是不斷的等待!而今天,相信媽媽和我都一樣,一起期待著小恆恆上學去的一天!當然啦、期望的背後亦有不少擔心的,例如很怕有一天收到老師的來電說:「請問是否黃書恆的家長?…他今早和某某同學仔……」!

三歲大的恆恆,和他的妹妹潼潼。

全家福 (5月19日追加)

恆恆,Happy Birthday呀!祝您九月開卷快樂啦!

5.14.2009
5.14.2009 09:54 黃頁
今日係農曆四月二十日(唔係咩電視廣告提提您…),已經好耐冇update個blog喇,因為爸爸近來真的很忙呢!

今日點忙都要寫兩句!
咁講,究竟今日係咩節日呀,咁忙都要寫blog、仲要講埋農曆提示嘅?當然係大日子啦!今日係小恆恆既舊曆生日呀!今年新、舊曆好近呀,仲有三日恆恆就三歲喇!


「恆恆你幾多歲?」;;;「三歲!」


大個仔喇,Shopping拎番自己啲嘢啦!

生日快樂!
4.05.2009
4.05.2009 19:35 黃頁
今日原本帶兩個落街shopping既,所以冇帶佢地去公園;雖然途中遇見有攤位遊戲,比兩小B玩左次撈金魚,但佢地明顯地玩唔夠啦!所以我地返屋企refresh一下之後,又再次出發喇!成日去公園、玩來玩去果幾樣,今日就搞搞佢、帶佢地落街玩吹泡泡啦!


恆恆好好耐都冇踩單車喇…而且仲未識自己踩!


等緊玩撈金魚既潼潼

恆恆小時候
還記得當時我地仲住系太古既時候(恆恆大概一歲多吧~),兩公婆經常都會帶小恆恆去玩具反斗城行街街既。有一次我地買左一大支吹泡泡,當日就帶左小恆恆去公園玩啦,仲記得當日媽咪吹到氣喘咁濟,支泡泡液先至消耗左5%左右!雖然之後都有玩過數次,不過事隔一年幾都係仲有好多好多剩…


恆恆:「等我黎啦!」

其實之前都有帶過支泡泡去公園玩,但係就…有一大班小朋友走埋黎、情況極之混亂!所以我地今日決定帶佢地落樓下空地玩好喇!


都係捉泡泡好玩D!


妹妹識行之後係第一次玩泡泡~

4.04.2009
4.04.2009 21:30 黃頁
今日係國際兒童節,兩公婆帶左兩小B去噴水池玩!其實之前已經去了N次,不過今次係第一次比佢地走入去噴水既範圍玩(當然只限暫停噴水既時間啦),亦係第一次同佢地到呢道影相!


潼潼首試赤腳踩水,興奮到不得了!


我地一「Yeah!」,恆恆就會擺出佢既招牌搞笑鋪士


唔聽人勸既恆恆走近噴水中既泉口!


潼潼妹一樣冇有怕,仲想拖埋爸爸落水呢!

所謂上得山多終遇虎,恆恆最後被噴中左一次,衫褲都濕左少少!此時此刻想起某次浩賢表哥都試過比呢個噴水池噴左一下「應」既,全身衫褲都濕透晒!好彩今次媽咪早有準備、帶左衫褲同佢替換啫!

較新的文章 較舊的文章 返回首頁 訂閱: 文章

最近發表的文章
歡迎光臨