2.22.2009
2.22.2009 23:45 黃頁
今日婆婆同公公帶埋表哥黎探兩小B,仲順手拎埋細舅父送比潼潼既生日禮物過黎添喎!

禮物係一架好靚靚嘅本馬車仔,爸爸組裝緊既時間,兩個B已經吼到實一實喇!既然係妹妹既生日禮物,當然係比妹妹玩先啦!不過潼潼只係拖拖拉拉左幾下、觀賞左一陣,連點玩都未學識啫,哥哥就出手喇!


潼潼即時驗收自己既生日禮物!
妹妹唔識玩,哥哥出手相助?

傻啦~梗係出手搶左去玩啦!可憐細細粒既妹妹已經比哥哥蝦慣左,只係喊左幾聲啫…而恆恆搶馬之後就絕塵而去喇,結果騎木馬既頭啖湯就咁比哥哥飲左喇!


潼潼:哥哥,不如你教我玩啦!

恆恆:好啦,咁我試一次比你睇啦!


最終奪回木馬車嘅潼潼勁開心!

後記:兩日後, 潼潼已經識騎部木馬車喇,仲騎得好開心添!

2.15.2009
2.15.2009 22:45 黃頁
近來潼潼因為頭髮長左,成日嬲住塊面仔好唔舒服,於是媽咪就買左個頭箍比佢帶喇!帶住頭箍既潼潼好似跳健身舞咁既look…
2.04.2009
2.04.2009 23:55 黃頁
二月四日、年初十,同上年一樣又係立春!寶貝女潼潼今日一歲大喇!

與嫲嫲同日生日
潼潼今年既新曆生日咁啱同嫲嫲既舊曆生日係同一日,由於爸爸家每年都會齊集同嫲嫲慶祝的,今年再加埋潼潼、可謂雙喜臨門!於是一家四口又一次由東涌返到鰂魚涌同大家一齊慶祝喇!

順手拜年
由於爺爺同嫲嫲新年返左大陸,我地一家到今日先出黎同晒所有人拜年~潼潼雖然未識逗到利是,但係人地比利是佢就會揸到實,而且對住相機任人影!恆恆就繼續扮 cool,明明識同人拜年又偏偏唔肯,而且成晚都叫住要走!結果多次比人拖左落街,仲次次都有收穫添!咩收穫?咪佢最愛既車仔囉!

哥哥一歲時去迪迪尼
講開哥哥,記得佢一歲果日,兩公婆帶左佢去迪迪尼,不過佢當時對果道冇咩興趣(同爸爸媽媽一樣!),加上恆恆一歲時仲未識行,全程BB車可能都幾悶!如果比著潼潼的話,家陣帶佢去應該會四圍走、好玩過哥哥好多既!潼潼第時知道唔知會唔會嬲嬲呢?

錯過了重要時刻
由出街搭車到食埋晚餐,潼潼其實已經好攰喇,切蛋糕之前就訓著左喇!一歲生日正日都冇得聽生日歌同吹蠟燭,有D可惜呢!潼潼第時睇番呢編文,千萬唔好嬲爸爸啊,爸爸保證以後會年都會唱生日歌比你地兩兄妹聽既!

生日快樂
點都好啦,一歲大喇,已經識行既潼潼算係大個女喇,希望佢以後健健康康,繼續日日笑口常開啦!


潼潼唔使逗都收到利是,好開心!


嫲嫲&潼潼 生日快樂!!


切蛋糕前潼潼已經訓著左lu~
較新的文章 較舊的文章 返回首頁 訂閱: 文章

最近發表的文章
歡迎光臨