6.30.2010
6.30.2010 17:09 黃頁

(續:生活札記 - 10年6月上)

原本只係路過,最終扭到入左去,但兩兄妹只係坐下車仔已經滿足晒,好乖! 2010-06-19

P-2010-06-19-Page

第二日經過就入左去玩喇,但因冇著襪仔而唔入得波波池,潼潼最失望喇!2010-06-20

P-2010-06-20-Page

恆恆:「阿妹,咩黎架?」呢排咩都學返個妹轉頭… 2010-06-20

P-2010-06-20-Page3

寶珠妹!(本來想影捲脷二人組,但恆恆已經唔記得左點樣捲脷喇…)2010-06-20

P-2010-06-20-Page4

左起,恆恆作品、潼潼影人、潼潼影景… 2010-06-20

P-2010-06-20-Page5

壓軸登埸:師奶潼!

P-2010-06-20-Page6 

六月係咁多喇,再見啦!(希望下次唔使再出D咁懶既post啦…)

6.25.2010
6.25.2010 13:52 黃頁

六月既開場白又係好忙,忙住睇世界盃…之餘,做野同屋企都好忙,所以冇咩時間寫野囉!既然係咁就只好post下相,叫做update下個blog咁話啦!

哥哥舊曆生日又有禮物收,潼潼扮鬼臉抗議無佢份! 2010-06-02

P-2010-06-02-Page

舞動兩兄弟,請鼓掌! 2010-06-05

P-2010-06-05-Page

潮流興圍觀,小朋友亦唔例外 !目標:白兔仔。 2010-06-05

P-2010-06-05-Page2

要集齊三張櫈仔、一隻木馬同一桶玩具,先至有得玩既「搭車」遊戲。2010-06-09

P-2010-06-09-Page

潼潼經常收晒枱先至話要食飯,唔通原煲食好味D?2010-06-10

P-2010-06-10-Page

黑媽媽喇,有乜野睇呢?原來恆恆覺得日落好靚,叫埋大家一齊睇喎!2010-06-13

P-2010-06-13-Page

好似好犀利咁喎…不過事後比我鬧得仲犀利,直頭鬧到反轉埋!2010-06-13

P-2010-06-13-Page2

 

其實仲有好多野,不過都係整理好D相先講啦…

(待續)

5.17.2010
5.17.2010 23:56 黃頁

一歲、兩歲、三歲…每年今日都會覺得時間過得好快…轉眼間,恆恆仔四歲喇!一個不停叫、成日喊既BB已經唔只會行、會跳、又會走#1,仲會唱歌、跳舞、寫字…四歲大喇,同三歲細路哥最大既分別係---恆恆開始有自己既主觀思想,對好多人、事、物都已經會有自己既見解同喜惡喇!襯住今日恆恆仔生日,就記一記佢鍾意既野啦。

P-2009-08-23 11-44-35愛玩 巴士

爸爸自問唔係巴士迷,唔知點解佢會鐘意左巴士既呢?可能係因為小時候,爺爺同公公都係送巴士模型比佢既關係啦!不過更有可能係因為小時候經常帶住佢坐巴士來回婆婆、嫲嫲屋企之故吧,事關佢最愛既一路都係黃色既城巴!

P-2010-02-16 12-55-19

愛玩 火車頭

恆恆既第一架Thomas係爺爺送既,當時佢仲好細個,唔算太有興趣。後來因為有D路軌已經殘殘地,於是比我地掉晒,得番架Thomas,點之跟住因為亞視重播喎,於是恆恆睇睇下就開始鍾意左喇!

話說有一次返康怡,恆恆係都話唔去、沿途仲不停扭計,最後兩公婆就用帶佢去吉之島買Thomas路軌,成功氹到佢唔再扭計喇。點知走人既時候,我地去到吉之島先發現一樓個入口已經鎖左,原來仲有五分鐘就收舖喇!好在,後門仲入到!又點知…一入到去發現上樓既電梯已經熄左兼封埋!又好在,我地發現樓梯係冇封既,於是即刻跑上玩具部啦!

當時原本只想買路軌就算既,不過爸爸冇玩Thomas既經驗、加上冇時間,搵到人地收舖都搵唔齊「行一個圈」要用既路軌!好彩最後有個好幫得手既後生仔店員,幫我地搵左一set路軌連兩架火車頭加直昇機既套裝。當時恆恆仔開心到想即刻開黎玩呢,我地當然唔比啦;仲要佢應承我地當晚唔準再扭計,到第二日起身先可以玩。結果恆恆仔一路乖乖咁坐車返到屋企,最後沖埋涼仲同原盒火車頭一齊訓添!第二日起身當然即時玩啦!不過一路以黎恆恆仔對砌路軌都係冇乜興趣既,反而阿妹就成日爭住砌囉。

P-2010-04-22 11-32-53愛玩 爆旋陀螺

成日講家陣D小朋友同以前好唔同,其實有好多野同我地細個時都仲係一樣既!好似呢樣咁,果排三色台播咩卡通片,D細路(尤其男仔)就鍾意玩咩玩具架喇;早排播爆旋陀螺,就成街D細路都堆埋一齊玩喇。

恆恆本來係完全冇興趣既,因為恆恆對電視版既爆旋陀螺一D興趣都冇(可幸也!),只係我地自己見人人都玩,又唔想個仔太單一、只係玩車仔,於是買來氹佢架啫!一開始佢亦因為唔係好識玩,所以幾日之後就已經幾乎唔玩喇!要到後來表哥搬左黎之後,有人一齊玩、兼且佢都學識埋點玩,就開始鍾意玩喇(但係都依然唔會睇卡通)!

而自從同表哥一齊玩爆旋陀螺之後,就開始有口頭蟬喇,就算唔係玩都會成日講「烈風天馬流星擊」#2;睇過星矢之後,仲自創左「烈風天馬流星拳」添#3!可能佢都覺得成日咁叫太長氣啦,近來就簡化成只係大叫「必殺技」就算喇!

P-2010-02-14-NDS-360愛玩 Mario Kart DS

以前恆恆一見我地打機都會爭住作第一身視線體驗既(即係將個頭伸到你同部機中間…),直至今年農曆新年,恆恆第一次真正自己打機;學識玩既第一個game係Mario Kart DS,而且第一次玩都冇包尾,跑第七位喎!一再挑戰之後,當日已經可以跑到第三、四名喇!

三歲就打機…呢個年頭似乎冇咩野,不過我地為左怕佢一玩愛上、再玩上癮、三玩沉迷,幾日之後已經將部NDS收起左喇。

愛看

除左鍾意睇Thomas & Friends之外,恆恆更愛看In the night garden (BBC),而且連妹妹都好鐘意睇,一套好似teletubbies既兒童節目,內容集集都咁上下,但小朋友就係鐘意D重複又重複既野啦,能夠重複地享受同一樣野帶黎既開心,小朋友真係幸福。#4


P-2009-10-14 17-29-16另外佢以前鍾意D英文台既兒童節目,不過都已經播晒、冇得睇lu;至於卡通,恆恆就鍾意國產既喜羊羊,當中最喜歡懶羊羊同主角喜羊羊,可惜係返左學之後冇得睇喇;黎到近排就變成表哥睇乜佢就睇乜(大學細,好自然啦),不過已經冇以前咁投入喇,當中衝鋒21算係比較有興趣D囉,不過睇緊既時間都係唔理劇情、主要係同表哥「開波」既!至於三色台既兒童節目呢(Sorry喎,家陣叫咩名呀?),恆恆係冇興趣既。

愛吃

暫時發現幾恆恆特別鍾意食既野包括pizza、芒果、啫哩同各式糖果等等…唔…其實佢幾乎咩都鍾意食既,或者講…跟本係佢鍾意食野!

P-2010-05-17 21-14-55 當然,唔鍾意食既野都有唔少,偏食係必然既架嘛,我自問由細到大都冇見過一個完全唔偏食既人囉!其中唔食菜係最緊要、由細到大都唔食既,返左學一排之後,試過有一段時間一見碟菜就會念咒語「蘇老師話食菜會動LL咁長高架喎!」#5、跟手就會食D菜,可惜果句咒語無幾之後耐就無效喇(佢都會講,但講完唔食囉!),其餘時間除左生菜包同涼拌青瓜同伙之外,根本叫唔到佢食菜!

愛喝

話說之前恆恆有一排胃口好差,我地千方百計想叫佢食多D野,最後以食晒飯有野飲一招成功令佢食返多D野,之後恆恆就鍾意左紙包飲品,仲會成日問我地要野飲添!不過,經過一、兩次因為病左而要誡口,完全唔比甜野佢飲之後,再加上返學習慣食完茶點要飲水,家陣恆恆已經好少會飲野喇,飲都多數係奶類或者豆奶,其中最鍾意既大概係朱古力奶喇;

P-2010-02-14 20-51-14 另外不得不提既係寶礦力,話說有一次佢病到飲水都痛,我地就用寶礦力溝暖水比佢飲(問過醫生的),自此就愛上左喇(呢點妹妹有相同經歷)。而講到最愛喇喎,應該係老火湯喇,一黎可能我地少煲,二黎當然係老婆煲得好飲啦,次次有湯都會飲好多既!

愛誰

每次同恆恆仔講「I love you」或「我愛你」,佢都會回返一句「I love you, too」#6或者「我都愛你」既,而且幾乎邊個同佢講佢都會咁回應既!不竟「愛」呢樣野對佢黎講仲係太抽象喇;不過另一方面,幾乎每次問佢愛媽咪定愛爸爸多D,佢都會好醒咁話「愛媽咪、愛爸爸」既,所以佢最愛邊個?真係唔知喎!之但係呢,如果講鍾意邊個同學仔就唔同喇,以前問佢會有三個可能答案(兩個女同學or一男同學),家陣問佢十次,佢十次都會答同一個答案既!至於係邊個喇喎?有機會見到恆恆仔既話,自己問問佢啦,據老婆講係全班最靚既女同學喎!


P-2010-05-17 21-18-42四歲之後

家陣D小朋友真係叻左好多,身、心發展都比我地呢代人快!我自己記得最兒時既記憶大蓋係四、五歲既事,我相信已恆恆一定唔會比我遲,佢應該已經開始緊發展永久記憶喇!所以呢,跟住落黎我地要做既係:比多D快樂既童年回憶比恆恆仔。


生日快樂

願你有一個快樂既童年!

2010年5月17日


#1 「會行、會跳、又會走」係恆恆成日唱既一首兒歌既歌詞。
#2 「烈風天馬流星擊」係爆旋陀螺主角既必殺技(?)。
#3 「天馬流星拳」係星矢既必殺技,加左「烈風」之後就係恆恆既必殺技…
#4 能夠重複地享受相同事物野帶黎既開心係天賦,小孩子本來就懂得知足而常樂之道,諷刺既係日日都有教D小朋友要知足囉!
#5 恆恆最聽班主任蘇老師既話,所以兩公婆經常利用佢黎「治」恆恆既。
#6 由於近排學會了 one two three ,所以有時會講「I love you, three」。

P-2010-05-16 11-55-59a

話說今日婆婆同姨媽過左黎同恆恆慶祝生日,不過黎到時佢都未放學,所以呢單野除左係發生係恆恆生日當天之外,係完全唔關佢事架!


據講事件發生係大家去食野既時候,叫左兩碟腸粉;跟住侍應一次過送左黎,一放低果下…


潼潼:「兩個叉燒飯咁多?」

(眾人大笑)

眾人:「兩碟腸粉呀!」

潼潼:「兩碟腸粉。」

(眾人續笑)


請大家唔好誤會,我地真係好少同佢食叉燒飯既,況且幾乎晚晚都係自家煮,根本無幾可食飯盒…都唔知點解成日掛住叉燒飯!

5.15.2010
5.15.2010 22:40 黃頁

P-2010-05-15-BeforeAndAfterHairDressing

之前同恆恆仔洗頭時見佢D頭髮雖然唔係好長,不過就已經好厚,所以諗住同佢剪定個靚髮過生日喇!

開頭問極佢都係話唔好、唔想剪既,不過當老婆再一次使出上次既必殺技#1 之後,佢就好乖乖咁跟左老婆入salon喇!

坐定定任人剪

今次係恆恆第二次成功 + 無痛地#2 於髮型屋剪頭髮!個師傅好好心機;恆恆又好好耐性;表哥又好幫得手咁陪潼潼玩;潼潼又冇扭計要走人;係一次完美既剪頭髮經歷!做咩講都好似好感動咁?你試一兩次帶個咁細既小朋友去剪頭髮你就知咩事架喇!

由呢幾張對照睇黎係剪之前好睇D既,不過查實剪左之後好睇好多,我地覺得係咁耐以黎剪得最好既一次!只係恆恆仔已經坐定定比師傅剪左好耐,耐性已經用盡左,點都唔肯企定定比我影張靚相,所以影得好求其,睇落唔靚囉!

#1 必殺技:究竟係咩呢?恆恆仔大個左之後如果想知既先問我地啦。

#2 無痛:唔好誤會,呢處講既「痛」係指我地兩公婆帶恆恆去髮型屋既痛苦經歷,而唔係剪親佢果隻痛呀!

5.14.2010
5.14.2010 16:38 黃頁

還有三天就到警察哥哥的四歲生日了,期待中…

P-2010-Hang-1-2-3-4

5.06.2010
5.06.2010 16:30 黃頁

近排恆恆久唔久就會拎住紙筆走黎問我地食乜野,近幾日連妹妹都跟住佢一齊玩。

有一次,妹妹走黎去問老婆:食乜野呀?老婆一話要牛腩粉佢就走左去扮拎野,跟住就扮捧住野咁走返黎,於是老婆問佢:咩黎架?佢話:叉燒飯!

(全場大笑)

老婆同佢講:我要牛腩粉喎!跟住佢又即刻走左去,再扮晒捧住野咁返黎喇,老婆再問佢:咩黎架?佢話:叉燒飯~喎!

(全場爆笑)

最終要到第三次先至捧到碗牛腩粉返黎。

哥哥扮得似D

相對而言,恆恆就扮得似好多喇,起碼佢唔會落錯order先啦!而且仲會問埋你飲乜野添,好似好識做生意咁!

P-2010-04-Soup

兩個B一見到相機就會係咁叫「比我睇下呀…」

所以暫時未影到佢地扮緊野既相!

(上圖:屋企偶爾先會煲老火湯,兩小B都好鍾意飲!)

4.13.2010
4.13.2010 10:08 黃頁

睇返呢篇個草稿日期,原來已經係一月頭既事;冇錯,寫左好耐…都係同一個藉口:好忙呀!言歸正傳,今個學年恆恆返K1,睇黎都返得幾開心呀!

呢篇原本有好多野寫,不過真係又係果句囉:好忙呀!好啦,無時間寫野就不如post多幾張相比大家睇啦,去片!

班相: 全部小朋友都望鏡頭喎,想當然老師一家花左唔少時間同佢地影呢張相?!仲有,恆恆個表情好搞鬼呀!!

班房內:


2009-09-25 14:07 你睇恆恆同佢個同學仔既身型差幾遠,尤其係個頭…2009-09-28 14:10 嬲到爆個樣,究竟咩樹呢?隔離個同學仔好似勸緊佢咁,好搞鬼呀!

2009-10-02 14:34 大家都望住上面,究竟望咩呢!?可惜學校個網頁咩都冇寫…2009-10-02 14:36-37 個樣好似幾醒咁!但叫佢Yeah就仲係楝起三隻手指。

2009-10-07 14:32 “哮"住同學仔舊Lego!!2009-10-23 14:30 唔知佢最後有冇放手呢!?


班房外:

留意右下踩單車果張…話說我地見到學校post左呢張相,之後問返恆恆先至知道佢學識左踩單車!又多一樣我地教極都唔識,而學校一教就識既野喇…

恆恆最愛既天台活動

恆恆最愛既天台活動

Party Time!

恆恆一向鐘意嚇人一跳既,哈佬喂party,?晒佢、勁投入呀!見到恆恆冇咩特別「裝身」就諗返起,學校系響開party之前唔知一日定兩日先同家長講,想同佢買件衫扮下鬼都趕唔切呀!

2009 Halloween Party

Party Time!

成日瞞住我地…

某日上學校網頁睇相,發現恆恆曾經做過「禮貌大使」,但又再一次---同學識踩單車事件一樣,佢完全冇同我地講過囉!做禮貌大使個樣好認真喎。待續…

4.09.2010
4.09.2010 17:03 黃頁

呢件其實係09年12月尾既事,不過因為近來太忙,所以到今日先至有時間整理下個blog既drafts…

種花得瓜

原本學校每人派左一株石竹花,同黎培養下小朋友愛惜花草之類云云的,可惜果排天氣實在太凍喇,結果恆恆同幾乎所有同學仔都種花得瓜,D花一棵一棵咁瓜晒喇!以下post兩張恆恆同石竹花既合照,以表懷念之情…

由左上起,順時針方向 1. 恆恆自己將棵花過盤 2. 恆恆準備帶棵花返屋企 3. 石竹回家後的大頭照 4. 種了兩星期:

P-2009-Iven@School-OneFlower

2.04.2010
2.04.2010 23:00 黃頁

二月四日、又一年了!寶貝女潼潼今日兩歲大喇!

越大

兩歲喇,正式進入Trouble Two-由BB變成小朋友既階段,特點只有一個字:煩!乜都想要、乜都要爭、咩事都喊…早在歲半已經係咁!如果Trouble Two係一年既…希望佢兩歲半就唔再Trouble啦!

P-Celebrate-Tung-Age2-w320

自我認知

我問:你係邊個?

潼潼:B~B~!

我問:BB叫咩名?

潼潼:黃~A潼!

好好打

好幾個月前開始,屋企就開始日日都上映同一套電影,內容係咁既:

一個男仔大喊:媽咪!

有個媽咪走出黎問:咩事呀?

男仔喊咁口話:妹妹打人呀!

媽咪問:妹妹做咩打人呀?

妹妹搶答:哥哥打人呀!

同普遍既電影一樣,呢套戲日日都會上十場、八場,睇到我地兩公婆幾乎可以掉轉頭講返D對白出黎!要補充既係,好多情況之下,呢套戲多數都係因為爭野(唔一定係玩具,有時可能只係爭「一」隻拖鞋啫…)而起既!而跟佢目擊者指出…雖然主動出手既多數係妹妹,不過哥哥亦偶爾會特登「引」妹妹出手既!而故事既大結局多數都係一拍兩散,冇人會爭到想要既野!

成日打哥哥,哥哥都錫晒佢!

不過點打都好,一爭完冇耐,兩個B又會一齊玩架喇,而且經常都會一齊做D好曳既野,例如走上梳化跳彈床、反轉張櫈仔黎坐之類啦!而且阿哥平時(冇野爭既時候)都好鍚潼潼既,例如你話要咬人、問佢咬妹妹好唔好,佢一定話唔好,仲會叫你咬爸爸添!

曳得黎又好識氹人

人人都話第二個學野會快過阿哥家姐,因為有個榜樣比佢學,而我地既親身經歷亦證明左呢一點。潼潼好快就學識行,之後好快跟左阿哥上梳化跳;好快識講野,之後好快識駁咀;好快聽得明我地講咩、之後就好快唔聽我地講野…總之呢一年就真係好快啦!

最叻既本領

潼潼講野咬字比同時期既哥哥好得多!不過學得最叻既係駁咀!本來當佢曳曳時,媽咪一叫打PatPat佢就會自己出手既,但過左一排就開識左講大話喇!

媽咪問:妹妹PatPat系邊呢?

潼潼答:冇~(攤開雙手)

媽咪話:系呢道!(指住佢PatPat)

潼潼回:坐住左(如果係企緊既會即刻坐低!)

芒果蛋糕

今日爸爸放工返屋企問哥哥有冇同妹妹講生日快樂,媽咪話已經唔知同佢講左幾多次喇!食埋晚飯又到左切蛋糕既時間喇!生日蛋糕又係例牌:芒果蛋糕,無辦法、兩個B都勁鍾意食芒果!(唔鍾意食芒果既請舉手…)可惜係二月芒果唔當造,今次D芒果酸到阿媽都唔認得!搞到連阿女都唔鍾意食,只係挑左D比較熟既比佢,雖然唔多夠喉,但都食到佢好開心。

話咁快兩年,就黎又抱唔起喇!

哥哥:「…生日快樂!」(呼一聲吹熄左支生日蠟燭)

1.31.2010
1.31.2010 13:45 黃頁

(回帶到2010年1月10日)

今日太爺爺九十大壽,一家四口黎到筲箕灣同大家一齊慶祝!

開席前大人有大人打麻雀,小朋友有小朋友「玩麻雀」,恆恆、潼潼同表姐、表哥齊齊玩,好開心!不過到埋位時,大少爺又黎唔肯坐定定;到就黎食完之際,又到二小姐扭計要去街!不過比起以前已經好左好多喇,兩公婆叫做食得安樂咁啦!

至於其他生日宴會既花絮,因為細表哥個Blog已經記載左喇,呢道唔想重複講喇、post幾張靚相好過啦!去片~

P-2010-01-10 18-37-41 P-2010-01-10 19-04-35 P-2010-01-10 19-12-52 P-2010-01-10 20-48-42 P-2010-01-10 21-37-26 P-2010-01-10 21-40-52 P-2010-01-10 18-38-55 P-2010-01-10 19-08-38 P-2010-01-10 20-33-43 P-2010-01-10 20-48-53 P-2010-01-10 21-38-56_2 P-2010-01-10 21-53-56

祝太爺爺生日快樂呀!

較新的文章 較舊的文章 返回首頁 訂閱: 文章

最近發表的文章
歡迎光臨