今次既目標係妹妹！

上星期先同個仔搏鬥完，老婆今日第三次拎起個剪髮器喇。而今日既目標係同個女剃光頭！

嘩…女仔黎喎，做乜剃光頭呢？

原來係因為個女Ｄ頭髮甩得好勁，加上佢近日既皮膚比較差，比Ｄ甩出黎既頭髮"吉"到好唔舒服，所以兩公婆先決定同佢剃左佢囉！

快加好

個女呢…雖然係大隻Ｂ，但係始終都仲係ＢＢ，相比起哥哥就一Ｄ反抗能力都冇！結果成個剃頭仔過程，兩公婆都冇遇到武力抵抗、順利完成！而且呀，個女光頭Look都OK喎！

相呢？

點解冇剃完頭仔既相？　傻啦你…私人珍藏黎架，點會四圍貼架？

兩個月來既進展

雖然佢地「住埋」都有成個幾月喇，但係因為哥哥始終仲係細個啦，佢對妹妹仲未係好接受呢！

最明顯係唔比兩個一齊同妹妹玩！幾乎每次我地兩公婆一齊同個妹玩佢都唔比既，一係大叫、一係是旦拖走一個…

想影多張相都難

本來好想多Ｄ影下佢地既合照架，但係最多都只係可以好似呢幾張咁：襯恆恆玩緊玩具時，人為地將佢搬埋妹妹度影番幾張…

點解咁想佢地合照？

因為大家都覺得佢地愈來愈似樣喇…所以爸爸咪想影Ｄ合照黎對比下囉！

2M6D/6.61kg/61cm---

今日特登請假同老婆帶個女去健康院，原來阿女已經6.61kg(約14磅9安士)，成61cm「長」…兩公婆都唔記得阿哥兩個月時有幾重喇，有時間要番查資料先…

除左度長磅重之外，今日既重頭戲係打針！呢樣野兩公婆就仲記得…當時阿仔既喊聲同喊既時間都係全健康院之冠既！至於阿妹喇喎，唔知係咪真係有咁攰呢，訓住打支針入去、一粒聲都冇出，抽番支針出黎…仲訓緊！

P.S.妹妹第時睇番可以笑下阿哥喇！

剪髮器再出動

近日天氣開始熱喇，所以兩公婆前兩日又拎起個剪髮器，想同個仔飛個靚髮喇！

講得做「又」就即是唔係第一次啦，對上一次(即係第一次)已經係剛剛搬過黎果時喇。其實爸爸諗起果次既情況，都唔係好想自己同佢剪！不過由於係老婆操刀…唔唔…一於試多次啦！

再修多一次：掂呀！

第二日，我地照原定計劃，做好心理準備同佢「搏鬥」多一次！

唔，結果呢…今次因為係修番Ｄ剪得唔好既位，唔知係唔係因為跌落水既頭髮相對少左好多既關係，佢表現得好合作，好快就搞掂左！正，兩公婆真係開心到幾乎喊左出黎呀！美中不足既係之前揀錯左個Adapter，剪得比預期短、效果差左少少啦…

後記：

老婆見同個仔剪左兩次都幾OK，於是又提議唔收我錢同我剪埋喎……唔……我諗左陣，都係唔好喇，我驚我叫得仲大聲過阿仔呀！

真係好快呀！

唔覺唔覺個女兩個月大喇，家陣有幾重？唔知呢，要過幾日先去健康院磅過先知喇！

發展方面，個女比哥哥醒好多呢，早在個多月大時已經開始識人喇，每當媽咪或者爸爸近距離同佢講野，佢都會報以微笑，甚至會開聲應人添！